Wednesday, July 26, 2017

மட்டு. வேலையற்ற பட்டதாரிகளின் போராட்டம் நிறைவு

SHARE
கடந்த 155 நாட்களாக மட்டக்களப்பு மாவட்ட வேலையற்ற பட்டதாரிகள் மேற்கொண்டுவந்த சத்தியாக்கிரகப் போராட்டமானது, கிழக்கு மாகாண விவசாய அமைச்சர் கி.துரைராஜசிங்கம் உள்ளிட்டோரால் வழங்கப்பட்ட உறுதிமொழியை அடுத்து செவ்வாய்க்கிழமை (25) மாலை முடிவுக்கு வந்துள்ளது.

அரசாங்க வேலைவாய்ப்புக் கோரி கடந்த பெப்ரவரி 21ஆம் திகதி முதல் காந்தி பூங்காவுக்கு முன்பாக இதுவரை காலமும் மேற்படி பட்டதாரிகள் சத்தியாக்கிரகப் போரட்டத்தை மேற்கொண்டு வந்தனர்.

கிழக்கு மாகாண விவசாய அமைச்சர் கி.துரைராஜசிங்கம், நாடாளுமன்ற உறுப்பினர் எஸ்.யோகேஸ்வரன், கிழக்கு மாகாணசபையின் பிரதித் தவிசாளர் பிரசன்னா இந்திரகுமார், கிழக்கு மாகாணசபை உறுப்பினர்களான கோவிந்தம்; கருணாகரன், இரா.துரைரட்னம் ஆகியோர் சத்தியாக்கிரகப் போராட்டத்தில் ஈடுபட்ட பட்டதாரிகளைச் சந்தித்துக் கலந்துரையாடினர்.

இதன்போது, வேலையற்ற பட்டதாரிகளுக்கு வேலைவாய்ப்பு வழங்குவதற்காக கிழக்கு மாகாணசபை எடுத்துக்கொண்ட நடவடிக்கை பற்றித் இவர்கள் தெரிவித்ததை அடுத்து, மேற்படி பட்டதாரிகள் தமது சத்தியாக்கிரகப் போராட்டத்தை முடிவுக்குக் கொண்டுவந்துள்ளனர்.

மட்டக்களப்பு நகரில் வேலையற்ற பட்டதாரிகள் மேற்கொண்டு சத்தியாக்கிரகப் போராட்டம் முடிவுக்கு வருவதுடன், கிழக்கு மாகாண சபையின் உறுதிமொழி நம்பிக்கை அளிப்பதாகவும் அம்மாவட்ட வேலையற்ற பட்டதாரிகள் சங்கத்தின் தலைவர் ரி.கிஷான் தெரிவித்தார்.

SHARE

Author: verified_user

0 comments: